Bacaan :
1 Musa 2 : 16-17, 3 : 1 – 7
Ambilan
Minggu 09 Maret 2014
Malas uhur halani sadarion aima Minggu/Pesta Wanita sa GKPS.
Ganup do
inang sa GKPS sadarion mamestahon in. Tontu sedo pitah soal ulang tahun in
tene, tapi das do hubani na manghamalaskon idop ni uhur ni Naibata na
‘membebaskon’ atap mamerdekahon inang humbani gomgoman ni dosa. Hinan terbatas
botul do na boi ihorjahon inang baik i keluarga, i kuria age bani goluh i
masyarakat marhitei larangan-larangan hubani pihak inang laho memeranhon
suruhan ni Tuhan. Lang boi gabe pemimpin, lang boi gabe pandita, lang boi
markarier, pakon na legan. Hinan hira haganup ‘peran’ do idominasi dalahi. Tapi
halani torus do gereja itorangi Hata ni Naibata, gabe berubah do homa pemahaman
pasal hajongjongan in. Anggo sonari ra hira ganup ma use boi ihorjahon inang,
na sadokah on pitah boi iperanhon bapa (dalahi). Maningon riap do hita mangidah
perubahan in sebagai bentuk idop ni uhur ni Tuhan na torus sedang berlangsung
laho patalarhon arti sepenuhni haluahon ai hubani dunia on, aima ase sesama
jolma on (age dompak na tinompa na legan) manggoluh ibagas hubungan na jenges.
In do na ipestahon hita haganup sadarion, halani lambin buei ma hita on na
mangarusi sura-sura ni Hata ni Naibata. Bani ambilan on hita mangulaki
merenungkon hajongjonganta, parlahouta, bahkan sonaha Naibata paluahkon hita
humbani dosa ampa akibat-akibatni. Tujuanni aima laho mangidah sonaha do tongon
goluhta ilobei ni Naibata, ase boi lambin tunduk hita hubani HataNi ibagas
goluh on.
2.
Jolma on manggoluh i antara aturan ni Naibata pakon
kebebasan na binereNi.
Anggo ibasa hita 1 Musa 1 : 28 – 29 tangkas do ijai
isobut bahasa adong ibere Naibata do kuasa hubani jolma na tinompaNi ai “Dob ai
ipasu-pasu Naibata ma sidea, nini ma dompak sidea: Manggompari anjaha lambin
manggargar ma hanima, goki hanima ma tanoh on anjaha patunduk ma in; rajai
hanima ma dengke na i laut, manuk-manuk na i awang-awang, pakon sagala binatang
na manjulur iatas tanoh on. Marsahap ma use Naibata: Hubere ma bennima sagala
suan-suanan na marbatu bani sab tanoh on, ampa sagala hayu na marbuahkon buah
na marbatu, ai ma gabe sipanganonnima.” Naibata mambere kebebasan sepenuhni
hubani jolma laho manrajai anjaha ipasirsir Naibata do sipanganon na gabe gogoh
bani jolma in ibagas goluhni. Tongon ibere Naibata do kebebasan bani jolma in,
tapi sihol do homa Naibata ase jolma na tinompaNi in manggoluh ibagas aturanNi.
Ase ulang jolma in na gabe naibata bani sesama na tinompa na legan, ibahen
Naibata do homa aturan-aturan na maningon ibalosi jolma in. On ma na ibasa hita
bani ambilan on “Dob ai ititahkon Naibata Jahowa bani jolma ai, nini ma: “Boi do panganonmu humbani ganup hayu na i
pohon on, tapi anggo humbani hayu pambotohan ni na madear ampa na masambor in,
seng bulih panganonmu; halani ijin ipangan ho hunjai, maningon matei do ho.”
Na tangkas taridah humbani ‘titah’ in aima idop ni uhur ni Naibata na sihol
mambere hagoluhan hubani jolma. Ipungkah do humbani ‘boi do panganonmu ganup….’
Tontu gambaran ni sibere-bere do on. Humbani sonin bueini sipanganon i taman
eden, pitah sada do na so boi panganon. Ai lang na banggal do holong ni Naibata
anggo sonai do? Tontu anggo adong sada larangan humbani sonin bueini kebebasan,
adong do ijai maksud-maksud pengawasan ase totap adong hubungan na dear antara
Sipanompa pakon na tinompa. Kebebasan ai lang dalam arti tanpa control, tapi
justru ijon Naibata mambahen sada ‘batas’ na lang boi ilampaui jolma in.
Tujuanni aima ase jolma in totap marhubungan pakon na manompa ia, aima Naibata.
Titah ai mambahen jelas bahasa penentu ni hubungan sedo jolma, tapi Naibata
sandiri do. Aima ase boi do iarusi hita bahasa ibahen Naibata ‘aturan main’
bani mungkahni, sasintongni sedo laho mambahen jolma on ‘terpenjara’ atap
‘terjerat’, tapi laho manjaga hubungan ai do ase totap adong anjaha dear ;
hubungan Sipanompa pakon na tinompa anjaha ase taratur homa goluh sesama na
tinompa. Age ronsi nuan, anggo adong aturan-aturan na ‘membatasi’ kebebasan ni
jolma na manggoluh bani zaman on, adong do torus kaitanni ai hubani hubungan
vertical (dompak Naibata) sonai homa hubungan dompak sesama na tinompa
(horizontal), aima ase totap terjaga hubungan baik.
3. Jolma hona siding ni sibolis, madabuh hu bagas dosa.
Sedo ulog (sibolis) ai na gabe sikkam mabarbar (factor
penyebab) ni jolma in madabuh hubagas dosa. Na iperanhon ulog ai aima
‘menggoda’ jolma in marhitei na ‘mempertanyakon’ hasintongan ni Hata ni Naibata
marhitei hata : “Adong do nani ihatahon
Naibata, na so bulih panganonnasiam humbani sagala buah ni hayu na i pohon on?”.
Strategi ni ulog na ‘manukkun’ ai sihol ‘mananggali tali’ (mangharhari)
persekutuan na dob irahut Naibata bani jolma on marhitei mantesting ; ibotoh
jolma in adong Hata ni Naibata atap lang. Sibolis (ulog) mulai humbani na
papeolhon aturan ni Naibata. Lang ongga ihatahon Naibata ‘na so bulih
panganonnima..’ tapi justru anggo parentah ni Naibata aima ‘boi do panganonima
haganup.. sobali…’. Tontu anggo lang dong pambotoh ni jolma in, urah mando
sibolis in manguasai. Lang pala ‘pusing’ be sibolis in be parsedahon parsaoran
ni Naibata pakon jolma, anggo ‘kosong’ do pambotoh ni jolma in pasal Hata ni
Naibata. On ma strategi na parlobei. Aima ase porlu do adong pambotoh homa
pasal Hata ni Naibata ase ulang urah ipapeol sibolis in pardalanan ni goluhta.
Anjaha anggo ididah hita humbani balos ni si Hawa, taridah do adong
‘pergeseran’ ai sanggah jolma in mencoba diskusi pakon sibolis pasal larangan
ni Naibata. Adong keinginan laho ‘pakoraskon’ larangan ni Naibata di hadapani
ni ulog ai, hata na mangkatahon “Bulih do panganonnami humbani buah ni hayu na
i pohon on; tapi anggo pasal buah ni hayu na i parsitongahan ni pohon on,
ihatahon Naibata do: Ulang pangan hanima hunjai anjaha ulang jamah, ase ulang
matei hanima.”. Jolma in mangorui anjaha manambah aturan ni Naibata. Ipamagou
ma hata ‘ganup do boi..’ anjaha itambah homa hata ‘anjaha ulang jamah..’ adong
kesan ijon bahasa na terjadi aima jolma in sihol pamagouhon arti holong ni
Naibata marhitei na membatasi na ibere Naibata. Kesan na mangihut aima jolma in
domma mulai memperberat Hata ni Naibata marhitei na manambahi ‘ulang jamah’.
Ijon ma taridah bahasa jolma in domma mulai masuk hubani jerat ni sibolis.
Jolma (si Hawa) mulai ragu bani idop ni uhur ni Naibata anjaha mulai mangidah
Naibata ai sebagai Naibata na ‘kejam’ bani aturanNi. Mambuka parsahapan pakon
sibolis ternyata mangubah pandangan ni jolma in pasal hasintongan ni Hata ni
Naibata. On ma bonani jolma in madabuh hubani siding ni sibolis.
4. Sihol ni uhur doskon Naibata mamboan hubani hamateian.
Sanggah adong pandangan ni jolma in bahasa Naibata
mamarentah marhitei disiplin na koras (penekanan hubani laranganNi), ijai ma
sibolis homa menawarhon solusi pasal aha na na ihabiari jolma in humbani aturan
ni Naibata ai. Nini ma use : ‘Seng tongon matei nasiam, tapi ibotoh Naibata do,
anggo ipangan nasiam hunjai, gabe buha ma matanasiam, doskon Naibata ma nasiam
mambotoh na madear pakon na masambor.’. Terjadi ma pemutarbalikan makna ni
aturan ni Naibata. Naparlobei, ‘seng tongon matei nasiam..’ tontu sada hal na
iharapkon ma on. Napaduahon, adong tawaran ‘gabe buha ma mata nasiam, doskon
Naibata ma nasiam..’. Lambin buha ma mata ni jolma in bani pambobai ni sibolis
ai, halani sonin ma jengesni na itawarhon. Gabe lupa ma bani Naibata halani
adong na menawarhon na status na baru na lobih banggal, aima doskon Naibata.
Sihol ni uhur doskon Naibata pe marbanggal ma bani hadirionni jolma in. Sihol
ni uhur aima use na mendominasi (manguasai) langkahni jolma in, mubah ma homa
age pangidah ni jolma in. On taridah humbani ayat 6 na mangkatahon : “Inonoi
naboru ai ma, dear do buah ni hayu ai panganon, jenges idahon anjaha
siharosuhkononkon, halani boi papentarhon; jadi ibuat ma buahni, ipangan ma,
ibere ma homa paramangonni na rap pakonsi ai, gabe ipangan ma.” Marhitei mata
ni sandiri mando use jolma in mangarusi goluhni, lang be marguru hubani
aturanNi Naibata. Ra gati do sonon goluhni jolma ; mardalan bani goluh on pitah
mamakei pangidahni sandiri halani adong ambisi sihol dos songon Naibata. Dobni,
na ididah pitah hinajenges ni dunia on. Anggo mangidah larangan atap aturan ni
Naibata domma pitung (ipapitung sibolis) matani. Pandangan na sonai patubuhkon
tindakan na bertentangan bani Hata ni Naibata. Ibuat anjaha ipangan si Hawa ma
sonai homa paramanongni dob ijalo, ipangan ma homa. On ma puncakni
panlanggaronni jolma in dompak aturannni Naibata. Akibat ni haganupan ai, gabe buha ma mata ni
jolma in pasal dirini na dob madabuh hubagas dosa ; domma ididah sidea na
talanjang sidea. Mulai ma rasa maila, adong ketidakdamaian, adong ma
kegelisahan, adong ma saling menyalahkon, pnl. Domma talar hahurangan ni nasada
hubani na legan. Marhorja ma biak-biak na manuju hu hamateian ai.
5. Hita haganupan, haganupan do hita sipardosa anjaha dosa ai sedo sesuatu
na berdiri di luar ni hajolmaonta, tapi ibagas dirini jolma in do ai melekat.
Halani bonani pe sedo hun darat tapi humbagas dirini jolma in do aima sihol ni
uhur laho dos songon Naibata (sipanompa). Lang porlu hita marsidalian be ise do
parlobei mardosa, dalahi atap naboru, haganup do hita sipardosa. Tapi domma
itobus Kristus in hita humbani gomgomanni dosa ai. Tontu na domma ipaluah,
porlu do sadar homa bahasa ronsi sonari sai na sihol ope sibolis in pakahouhon
hita. Buei tawaran-tawaran na ipasirsir sibolis sonari. Lang pitah i tiga, tapi
i gareja pe ra do isidingi hita. Halani ra do nini sada inang sanggah manangar
ambilan ; eda..eda.. hona si si anu tene bani ambilan ni Pandita ai… Tuhan
maarsahap, hape uhurni menyudutkon hasoman. Buei ope homa tawaran-tawaran na
legan, sanggah sosak hita ijai ma ra porlu banta jalan pintas (age lepak) as
alma maluah, nini hita. Hape domma magou. Pae-pae hita, ijon pe sonari adong do
sidingni sibolis da laho parsedahon parsaoranta pakon Naibata sonai age
parsaoranta samah hita. Ase marhitei ambilan on ipagolpa do hita ase ulang gabe
ikuasai sibolis in goluhta. Halani ijin hita mambere diri hubani ‘arahan’ ni
sibolis, ijai ma cara pandangta pasal goluh on tartuju hubani dirinta pakon
sura-suranta tumang, lang be pasangapkon Naibata. Ase marhiteihon pestata homa
sadarion, boi lambin ipadear hita ‘hubungan’ dompak Naibata age dompak sesama
itongah-tongah ni keluargata bei, bani kuria age masyarakat pe. Selamat Minggu
Wanita ma… Amen
Pdt.Aman Saud
Purba
Tidak ada komentar:
Posting Komentar